八月五日罷唔罷工，相信好多人都心中有數
喺到想同一班仲諗緊、仲掙扎緊、仲顧慮緊嘅人講
呢張文宣圖，我係打風嗰日喺屋企睇到
我一直望住呢張圖，腦海有好多畫面同感受
希望大家唔好忘記，六月九日一百萬人遊行反逃犯條例
當晚政府就出咗聲明「繼續二讀審視條例」
後來爆發六月十二日衝突，政府先將呢條惡法暫停
但衝突間，為我地抗爭同將惡法暫停嘅義士已經被告上暴動罪
而政府莫視我地五大訴求
令到一班又一班年輕嘅前線為香港去抗爭而被捕
我地除咗對住直播電視表達痛心之外
其實係咪都可以再行多步 再做多啲嘢呢?
五年前雨傘失敗後，步入社運寒冬
好多人都好灰心
見到政府一條又一條惡法惡政策通過
我地除咗怨恨痛罵之外，其實心底裡都會諗
" 仲可以點丫? "
呢家我就同你講係可以點！
罷工有冇用，其實唔需要諗
如果用"有冇用"嘅結果論嚟評論過程係無意思
因為過程之中，你永遠唔會知道結果係點
但如果一開始就否定或抺殺所有可能性
咁香港就好難有一個自由民主
所以最重要嘅係，無論咩方法，都要試
我地罷工，係對政府一種訴求表態
我地罷工，係對前線或被捕人士一種支持
香港爭取民主嘅路上，呢家正處於一個最關鍵時刻
每一日都有新嘅抗爭模式
每一日都創造緊歷史
雖然好理想化
但我相信
只要堅持落去
訴求一定會達到
總有一日
我們唔再需要害怕恐懼
而慢慢除低頭盔口罩
與身旁的同路人
相擁而哭
八月五日罷工，七區集會
可能都會成為香港歷史性嘅一頁
或許將來我地慶幸自己有份參與見證
不如我地罷工，一齊編寫歷史
好嗎? 香港人。
知道好多人唔知集合地點，都分享下比大家知。
↓七區同時集會↓ 下午1點開始
沙田- 百步梯
旺角- 麥花臣球場
大埔- 風水廣場
屯門- 屯門政府合署
荃灣- 荃灣公園
金鐘- 添馬公園
黃大仙-黃大仙廣場
Search